Германияда Америка қирувчи самолёти ҳалокатга учради

Германия жануби-ғарбидаги Трир-Саарбург ҳудудида F-16 қирувчи самолёти ҳалокатга учради.

Американинг Шпангдалем авиабазасининг жамоатчилик билан алоқалар бўлими самолёт АҚШ ҳарбий-ҳаво кучларига тегишли бўлганлигини ва уни америкалик учувчи бошқарганини маълум қилди.

Хабар қилинишича, учувчи катапульта орқали самолётни тарк этишга улгурган, уни қидирув гуруҳи топган бўлиб, учувчи енгил жароҳат олган.

Маҳаллий полиция бўлимининг аниқлик киритишича, учувчи касалхонага олиб кетилган.

Воқеа жойи қуршаб олинган, бу ерда қутқарув хизматлари ва полиция ишламоқда.

Авиаҳалокат сабаблари аниқланмоқда.