«Қумтор» олтин кони тўлалигича Қирғизистон тасарруфига ўтди

«Қумтор» олтин кони тўлалигича Қирғизистон тасарруфига ўтди. Бу ҳақда Қирғизистон президенти Садир Жапаров маълум қилди.

Унинг сўзларига кўра, «Центерра» компанияси билан низони мувофиқлаштириш тўғрисида келишув имзоланган.

«Шундай қилиб, биз йирик миллий бойлигимиз - «Қумтор» кони тўлалигича Қирғизистонга ўтишини таъминладик. Бу «Қумтор» тўлиқ Қирғизистонга тегишлилигини англатади. Бугунги кун бурилиш они сифатида мамлакатимиз тарихига киради», деди Жапаров.

Жапаровнинг айтишича, «Кумтор Голд Компани» компаниясининг 100 фоиз акцияси Қирғизистонга ўтган.

Маълумот берилишича, «Қумтор» кони уч миллиард долларга баҳоланмоқда.

Қирғизистон президентининг сўзларига кўра, мамлакат яқин 10 йил ичида «Қумтор»дан 160-200 тонна олтин қазиб олиб, 5 миллиард доллар фойда кўради.

#Қирғизистон
#Қумтор