Буюк Британия Россиядан темир ва пўлат импорт қилишни тақиқлайди

Шунингдек, Россияга «квант технологиялари, замонавий материаллар, ҳашаматли буюмлар» экспортини тақиқлаш кўзда тутилмоқда.

Буюк Британия 14 апрелдан Россиядан темир ва пўлат импорт қилишни тақиқлайди. Бу ҳақда Британия ҳукумати матбуот хизмати маълум қилди.

«Эртадан бошлаб Россия темири ва пўлати импортини тақиқлаймиз», — деди Буюк Британия ташқи ишлар вазири Лиз Трасс.

Қайд этилишича, 14 апрел куни тегишли қонуности ҳужжати кўриб чиқиш учун Британия парламентига тақдим этилади.

Ҳужжатда шунингдек, Россияга «квант технологиялари, замонавий материаллар, ҳашаматли буюмлар» экспортини тақиқлаш кўзда тутилган.

15 март куни Евроиттифоқ Россиядан пўлат ва темирдан тайёрланган маҳсулотлар импортини тақиқлаганди.